Ein Rhaglenni

Aros Gwybodus

E-fwletin

Ystafell Newyddion Cyfanfyd

Edrych i'r Dyfodol: Fforwm Blynyddol Cyfanfyd

agm talkDdiwrnod ar ôl i’r llywodraeth glymblaid newydd gyhoeddi’i thoriadau cyllidebol cyntaf – gan DFID mewn perthynas â phrosiectau ymwybyddiaeth o ddatblygu – roedd yr awyrgylch yn Fforwm Blynyddol Cyfanfyd yn adlewyrchu pryder a pheth ofn o ran yr hyn sy’n ein haros. Roedd y diwrnod wedi cael ei gynllunio gan roi ffocws clir ar ddyfodol ADCDF/ addysg datblygu yng Nghymru a’r DU ond bu i’r newyddion bod 5 o brosiectau ymwybyddiaeth o ddatblygu wedi cael eu dileu a bod y Gronfa Ymgysylltu â Datblygu Byd-eang wedi cael ei hatal daflu cysgod amheuaeth dros unrhyw weithgarwch yn y dyfodol. Roedd cynrychiolwyr mudiadau a sefydliadau yn y sector dysgu ffurfiol ac anffurfiol a’r sector gwirfoddol wedi dod ynghyd yn yr Eglwys Norwyaidd yng Nghaerdydd i glywed safbwyntiau siaradwyr gwadd am ddatblygiadau.

Fe siaradodd Dr Doug Bourn, Cyfarwyddwr y Ganolfan Ymchwil Addysg Datblygu yn Athrofa Addysg Prifysgol Llundain am y pwnc ‘Towards a new Pedagogy for Development Education’ gan gyfeirio at y DU fel enghraifft o arfer da am fod ganddi, tan nawr, un o’r cyfundrefnau cyllido gorau ar gyfer addysg datblygu, ac fe siaradodd hefyd am yr heriau a oedd yn wynebu’r gymuned addysg datblygu wrth ganlyn arni â gwaith. Yng Nghymru, roedd polisi bellach yn bodoli a oedd yn cydnabod ADCDF, ond yn awr mae angen ei roi ar waith â dealltwriaeth go iawn am yr ethos sy’n sail i’r polisi a ddatblygir. Mae’n amlwg bod angen deall cysyniadau cyd-ddibyniaeth a chydgysylltiad ond gan eu hystyried mewn modd beirniadol mewn perthynas â’n hagweddau a’n tybiaethau ni ein hunain. Mae angen edrych yn bellach na rhethreg a gwneud addysg datblygu’n rhan annatod o ddysgu ac addysg; adnabod ansicrwydd a datblygu strategaethau ar gyfer dysgu byd-eang; ystyried a oes nod neu ddeilliant gosodedig yn gysylltiedig ag addysg datblygu ynteu a oes angen i ni herio anghyfiawnder ac anghydraddoldeb trwy arfogi dysgwyr i ddeall y cysylltiadau rhwng pwy ydynt a’r hyn y maent yn ei brofi’n lleol a’r darlun mwy, byd-eang. Bydd wastad brwydrau a heriau, a lle’r gymuned addysg datblygu yw adnabod y rhain ac addasu mewn ymateb iddynt, parhau i herio uniongrededd blaenllaw a cheisio cynrychioli pob safbwynt a barn gan alluogi’r dysgwyr i ffurfio barnau beirniadol a deallus ac ymateb yn briodol iddynt.

agm discussionCafwyd sesiwn holi ac ateb fer yn dilyn anerchiad Dr Bourn, ac wedyn bu Nathan Cook, Swyddog Polisi yn Uned Cydlyniant Cymunedol Llywodraeth Cynulliad Cymru’n annerch y grŵp ar bwnc ‘Cydlyniant Cymunedol ac ADCDF’. Yn ddiweddar, mae LlCC wedi lansio ‘Cymru’n Cyd-dynnu’, sef ei strategaeth ar gyfer cydlyniant cymunedol. Mae hon yn seiliedig ar yr ymrwymiad yn ‘Cymru’n Un, Cenedl Un Blaned’ i sicrhau ‘cymdeithas deg a chyfiawn yng Nghymru’ a’r ymwybyddiaeth bod twf wedi bod ers 9/11 a 7/7 mewn gwahaniaethu ac ymddieithrio yn y gymdeithas yng Nghymru, a bwysleisiwyd gan y terfysg hiliol ym Mharc Caia yn Wrecsam yn 2003. Mae LlCC wedi ymgynghori ynghylch teimladau pobl am y cymunedau y maent yn byw ynddynt ac wedi blaenoriaethu’r meysydd y gellir gweithredu ynddynt er mwyn hybu ‘cydlyniant cymunedol’. Mae’r strategaeth newydd yn canolbwyntio ar bum maes gan gynnwys dysgu, cyfathrebu, cynhwysiant cymdeithasol ac atal eithafiaeth dreisgar. Gellir creu cysylltiadau ag ymrwymiad Cymru i ddatblygu cynaliadwy – ‘gwella lles economaidd, cymdeithasol ac amgylcheddol pobl’ – ac â dinasyddiaeth fyd-eang ar ffurf ymwybyddiaeth o’r byd, amrywiaeth a chyfiawnder. Mae’r gronfa cydlyniant cymunedol yn canolbwyntio ar ddiwylliant ac integreiddio, ESOL, troseddau casineb ac agenda PREVENT ac mae cysylltiadau â’r cwricwla Addysg Grefyddol ac ABCh mewn ysgolion wedi cael eu cyfleu’n eglur. Mae pecyn cymorth yn cael ei ddatblygu ar gyfer addysgwyr yn y maes hwn. Cafwyd adborth ar yr angen am gymorth ac am ddarpariaeth gynyddol ym maes ESOL ac fe ofynnodd Nathan Cook i bobl anfon unrhyw sylwadau pellach at Steve Bowden sydd ar secondiad ar hyn o bryd i’r uned cydlyniant cymunedol er mwyn gweithio ar hyn.

Ar ôl cinio fe siaradodd Liz Thomas a Hanna Miyir yn fyr am y prosiect gan Cyfanfyd sy’n cael ei ariannu gan DFID, Southern Voices: Welsh Choices ac aethant ati i lansio’r Cyfeiriadur o fudiadau BME a grwpiau ffydd lleiafrifol sy’n gweithio ym maes ADCDF yng Nghymru. Mae hwn yn sicr yn ‘waith ar ei hanner’ ac yn grynodeb o’r ymchwil gychwynnol y mae Hanna wedi bod yn ymgymryd â hi yn ystod blwyddyn gyntaf y prosiect.

Siaradwr olaf y dydd oedd Scott Sinclair, Rheolwr Rhwydwaith Ysgolion ADCDF a siaradodd am ‘Ddatblygu’r Rhwydwaith Ysgolion ADCDF’. Gan fyfyrio ar y sgyrsiau blaenorol fe gynigiodd Scott y safbwynt cadarnhaol y bydd gweithgareddau ym maes addysg datblygu / ADCDF yn parhau ni waeth faint o gyllid fydd ar gael, a dywedodd fod gennym lawer i’w ddysgu a llawer i’w ddatblygu ymhellach … fe roddodd drosolwg bras ar ddatblygiad y Rhwydwaith Ysgolion ADCDF er bod y prosiect yn un byrdymor iawn ar hyn o bryd a bod ei ddyfodol ar ôl mis Medi 2010 yn ansicr. Mae angen i’r rhwydwaith ystyried sut y bydd yn cael ei ddatblygu yn y dyfodol, gan feddwl sut i wella ansawdd, pa strategaethau fydd yn helpu ysgolion i arwain yn hyn o beth a beth yw rôl y gymuned addysg datblygu. Mae bwriad i weithio mewn partneriaeth ac i ganolbwyntio ar synergeddau rhwng mudiadau a sefydliadau, ysgolion a phobl ifanc ac i ddatblygu arfer priodol, arloesol ac effeithiol i fynd ati go iawn i sefydlu ADCDF fel elfen annatod mewn ysgolion a’r cymunedau ehangach. Cafwyd trafodaeth a oedd yn canolbwyntio ar yr agweddau ymarferol ar ennyn cyfranogiad pobl ifanc; sut i sefydlu’r gwaith fel elfen annatod mewn ysgolion; sut i groesi’r sectorau – pa bosibiliadau ar gyfer gwaith rhwng cenedlaethau? – sut i rymuso ysgolion, athrawon a disgyblion i ganlyn arni â’r gwaith hwn. Mae angen i ni gydnabod bod potensial sylweddol mewn ysgolion (a’r meysydd addysgol ehangach) ac mai rôl y sector gwirfoddol yw cydnabod hyn a chwilio am ffyrdd o ddatblygu, newid, addasu ac ymateb iddo.

Cafodd pob un o’r tri anerchiad a lansiad y Cyfeiriadur dderbyniad da. Wedyn treuliwyd amser ar y rhan ffurfiol o’r dydd gyda CCB Cyfanfyd yn derbyn cofnodion, adroddiadau ariannol ac yn cymeradwyo penodiadau i’r Pwyllgor Gweithredol. Mynegwyd gobaith y byddai’r hinsawdd wleidyddol yn caniatáu i’r gwaith hwn barhau ac roedd y cyfranogwyr yn cydnabod y gallai fod angen gweithredu yn y dyfodol agos i lobïo’r Llywodraeth (LlCC a Llywodraeth y DU) i sicrhau dyfodol a diogelwch y maes hanfodol hwn.

Newyddion Hŷn